Nadzam Fikih Karya KH. Nawawi Abdul Aziz Al-Hafidz
NADZOM FIQIH KH. NAWAWI ABDUL AZIZ(PP.ANNUR Ngrukem, YOGYAKARTA)
Bismillaahirrohmaanirrohiim....
Mugi ALLAH paring rohmat
Salam ing nabi pungkasan
Nuli kluargo sohabat
Lan anggota malam selasan
Agomo telu rukune
Iman islam lan ihsane
Lakonono supayane
Becik lahir lan batine
Rukune Agomo
Nem werno rukune iman
Siji iman marang ALLAH
Loro iman malaikat
Telu iman kitab ALLAH
Papat iman poro Rosul
Limo iman dino akhir
Nenem iman marang pesten
Olo bagus saking ALLAH
Rukune Islam
Limo rukunipun Islam
Syahadat Sholat lan Siyam
Zakat Haji yen kuwoso
Sarto dalane sentoso
Kang Aran Ihsan
Ihsan iku lakon bagus
Tepo sliro ra kementhus
Atine ikhlas lan lurus
Pangucape sarwo alus
Nyembah marang ALLAH nyoto
Koyo weruh kasat moto
Ra orane kudu ngroso
ALLAH iku tansah perso
Perinciane Rukun Islam (Syahadat)
Tegese Syahadat kudu
Ngandel lan ngucap asyhadu
An la illaha illallah
Muhammadur Rosulullah
Ora ono kang dak sembah
Kejobo mung gusti ALLAH
Lan Muhammad bin `Abdillah
Iku utusane ALLAH
Syarat Wajibe Sholat
Wong mukallaf iku tamtu
Wajib sholat limang wektu
Wajib mrintah anak putu
Purih sholat limang wektu
Sholat kanthi berjama`ah
Iku ganjarane tambah
Tikel pitulikur faedah
Tinimbang tanpo jama`ah
Syarat Sahe Sholat
Limo syarat sahe Sholat
Siji manjing wektu tepat
Loro kudu nutup aurot
Telu kudu madep qiblat
Papat nuceni najise
Badan papan lan sandange
Lima nuceni hadase
Ingkang alit lan agenge
Perinciane Syarat Sahe Sholat
Ora dadi lamun Sholat
Durung manjing lamun telat
Disengojo wajib taubat
Sarto Qodho' ojo nekat
‘Aurote tiyang jalere
Antara dengkul pusere
‘Aurote putri liyane
Epek-epek lan rahine
Wong kang bingung arah qiblat
Iku saben arep sholat
Wajib mikir nuli sholat
Manut mantepe i'tiqad
Najis telu pirangane
Siji kang abot hukume
Loro kang enteng hukume
Telu mejono hukume
Najis abot iya iku
Najise babi lan asu
Dikumbaho kaping pitu
Kang siji dicampur lebu
Kang enteng uyuhe lare
Alit kang rupi jalere
Kang namung pohan dhahare
Durung rong tahun umure
Carane nuceni iyo
Cukup disirati toyo
Najis kang mejono kaya
Wutahan, uyuh, tahiyo
Saceng, bathang, getih, nanah
Carane nuceni kedah
Roso lan gondone miwah
Rupine ical kekumbah
Nanging suci telu bathang
Yo iwak banyu lan walang
Sarto halal kanggo madang
Ping telune bathang tiyang
Babul Wudhui
Wudhu iku nem wernane
Siji niyat ing atine
Loro masuhi rahine
Ping telu basuh tangane
Karo tumeko sikute
Ping papat ngusap sirahe
Ping limo masuh sikile
Karo nem tertib lakone
Batale Wudhu
Batalake wudhu iro
Wenehe limang perkoro
Siji metune perkoro
Saking dalan loro iro
Nanging mani ingkang metu
Ora mbatalake wudhu
Ping pindo turune uwong
Kang tanpo netepke bokong
Telu ilang pikirane
Sebab mendhem lan larane
Papat gepok senggolane
Wong lanang serto wadhone
Kang sampun sami agenge
Tanpo ono ling alinge
Kang dudu mahrom dununge
Antara wadon lanange
Ping limo ndemek farjine
Utowo ndemek dubure
Menungso klawan bathine
Epek-epek lan drijine
Mujibatul Ghusli
Perkoro kang nyebabake
Wajib adus iku nenem
Sepisan iku janabat
Sebab metu mani ladzat
Ugo sebab tetemune
Lanangan lan wadonane
Loro manak ping telune
Ngedusono wong matine
Papat haidle lamun mampet
Lima nifas lamun mampet
Nem najise badan tetep
Ning mapane ora inget
Furudhul Ghusli
Rong werno ferdlune adus
Siji niat loro harus
Kabeh kulit rambut terus
Di siramo nganti kelebus
Babut Tayammumi
Lamun ngudzur nganggo banyu Kamongko wis manjing waktu
Tayammumo kelawan lebu
Minongko gantine wudlu’
Yen ngudzure sebab tatu
Sak weneh nggoto wudlu’
Tayammumo yen wus wektu
Lan wudlu kang ora tatu
Tayammum limo fardlune
Ngaleh lebu lan niyate
Ngusap rahi lan ngusapi
Tangan loro lan tartibe
Syarat kang kasebut kudu
Di tetepi ugo kudu
Netepono rukun baku
Supoyo sah sholat iku
Arkanus Sholati
Telulas rukune sholat
Sepisan atine niat
Loro takbir, telu ngadek
Papat fatihane jejek
Limo ruku' thuma'ninah
Nem i'tidal thuma'ninah
Pitu sujud thuma'ninah
Wolu lungguh thuma'ninah
Tahiyyat akhir songone
Lungguh akhir sedosone
Sewelas moco sholawat
Sakwuse moco tahiyyat
Rolas salam kang sepisan
Tertib rukun kang pungkasan
Jumlah limo rukun wacan
Wolu rukun penggaweyan
Ingkang aran thuma'ninah
Iku anteng tanpo obah
Kadar cukup subhanalloh
Tambah dowo tambah faedah
Sujudo ojo kesusu
Nucuk koyo pitik kelawu
Dene sahhe sujud iku
Wajib mawi nggoto pitu
Iyo batuk kang kabukak
Lan bathine epek-epek
Lan dengkul kang tan kabukak
Lan bathine deriji telapak
Batale Sholat
Dadi bathalake sholat
Kurange sak weneh syarat
Lan kurange rukun sholat
Ugo sebab moho ngucap
Obah polah nuli-nuli
Genep telu najan lali
Mangan najan mboten katah
Ugo guyu latah-latah
Piro-piro Sunnahe sholat
Mukul kang banget lan melumpat
Niat megotake sholat
Gantungake pegote sholat
Bingung ing pegote sholat
Nambahi rukun penggawe
Di sejo lan ngeri dewe
Saking imam rong penggawe
Lan disikke rong penggawe
Rong werno sunnahe sholat
Siji ab'adh loro hai'at
Dene wilangane sunnat
Ab'adh pitu ojo kelewat
Yo moco tahiyyat awal
Lungguhe tahiyyat awal
Sholawat nabi tan ketinggal
Sakwuse tahiyyat awal
Sholawat atas keluargane
Kanjeng nabi nalikane
Lungguh akhir sak ba'dane
Sholawat nabi urutane
Limo qunutipun sholat
Shubuh nenem moco sholawat
Salam ing nabi Muhammad
Serta keluarga shahabat
Sunnah hai'atipun sholat
Iyo iku sunnah ngangkat
Tangan loro teko welikat
Waktu takbir wiwit sholat
Ngangkat ugo wektu ruku'
Lan tangine saking ruku’
Waktu ngadek iyo budal
Saking tahiyyat kang awal
Dunga' iftitah sertane
Ta'awwudz ugo amine
Moco surat al Qur'ane
Tasbih ing ruku' papate
Nuli moco sami'alloh
Terusno liman hamidah
Tasbihipun sujud miwah
Robbighfirli waktu lenggah
Seru mocone fatihah
Lan Qur'an ing sholat jum'ah
Roka'at awal lan kaleh
Ing maghrib, 'isya', lan shubuh
Tumerap imam kang di anut
Lan ijen kang ora manut
Sakliyane kang kasebut
Sunnah moco lirih patut
Iftirosy ing kabeh lungguh
Lejobo naliko lungguh
Akhir mongko sunnah saguh
Tawarruk anggone lungguh
Moco takbir saben pindah
Saking saben rukun tingkah
Rahine madep sajadah
Sunnah lungguh istirohah
Moco sampurnane sholawat
Nuli dungo ba'da sholawat
Ing lungguh akhiri sholat
Salam kang kapindo tammat....
Komentar
Posting Komentar